السسسسسسسسسلام عليكم ورحمة الله وبركاته

والله مير يمسيكم بالخير والمسرات

وكيف حالكم .. هاه بشرونا ان شاءالله انكم بخير :==١:

انا اليوم داخل متفلت .. وبراسي كومة هياط وناوي احطها فيذا بهالقسم

المهم ياحلو انت وياه ( ماجاز لك رايي .. ماعجبك طرحي .. ماهضمت كلامي .. ابد قل رايك .. بس انتبه لايطق فيك عرق ونبلش فيك )
يعني بالعربي لاتعصب .. وعطنا رايك بكل بساطه







كلكم او اغلبكم تابع برنامج خواطر6 .. وأحلى سلام كبير لاختي بسمه ومعليش ياوخيتي ندري انتس مسويه تغطيه عنه :==١:
بس الواحد لازم يفضفض عن اللي فيه << الله واكبر

هالبرنامج ماأنكر اني من العام وانا خاقن معه .. ولازلت خاقن معه :ق١:
وافكاره حلوه جدن جدن .. وكل حلقه تكون اطلق من اللي قبلها .. لكن عيبه انه ماينفع لنا ابد


المهم انا واعوذ بالله من هالكلمه العام كتبت معروض لابو شقيري .. وقلت له ( مساك الله بالخير )
بس ماجاني رد :151:

لكن هالمره ناوي اجدد المعروض من جديد
وابمسيه بالخير .. وابجدد له حتسيي مع كم كلمه تقرقع بقلبي .. وابمسكه مع طرف ثوبه
واقوله ياخي ماتفهم انت


قولو اني انسان غير متفائل
قولو عني انسان محطم
قولو اني انسان محصور وفكره محدود
لكم كل الحريه بكلامكم

بس معليش الواقع واقع .. وهذا رايي وهذا اللي اشوفه


اول شي خلونا نستعرض الحلقه الثامنه من الجزء السادس لهذا العام ونشوفها كلنا .. مع ان لي كلام كثير عن الحلقات السابقه
بس انا ابتكلم عن هالحلقه بالذات .. لان وزير التربيه والتعليم تدخل فيها





وعقبن خلونا نقرا هالخبر :


كلام جميل .. وشي رائع .. لكن عجز يدخل براسي :==١:


اولاً انا عندي قناعة ان الكاميرا كذابه جدن جدن جدن جدن .. حتى انها غطت على مسيلمه في فقشاته

وشي طبيعي ان الكاميرا راح تكون بهالشكل .. وراح تكون الصورة بنفس ماشفناها .. ومستحيل تكون الصورة مشوهه
واكبر دليل .. عمركم سمعتو مسئول كبير بيطلع لزيارة تفقديه لديرة بقلايع وادرين ومانظفو الديره وزبرقوها :151:


نعنبو بليسكم انا اذكر ان الصناعيه الثانيه اللي على طريق الخرج كلها حفر ومكسره من هالتريلات
يوم قالوا ان فيه مسئول بيزور احد المصانع .. بنص يوم طقو الشوارع بزفلت جديد .. والارصفه زرعوها وفرشوها ثيييل وورد احمر
والمشكله ان هالورد يومين ويفطسن

ولا عمركم سمعتو عن نظام يطرحه مسئول ويعتمده .. يقومون به الموظفين باكمل وجه
واكثر ماكثر الله الانظمه عندنا .. وفيه انظمه معتمده والله نصنا مايدرون عنها .. حتى اللي يدرسون قانون مايدرون عنها


هذا أولاً

ثانياً .. كيف حالك يابو شقيري .. وش اخبارك .. عساك بخير << الله مير يسلمك :==١:
بلاهي يالحبيب وش هالمدرسه اللي انت مطبق فيها فكرتك الجهنميه بتنظيف المدارس
ياشيخ من قوة الخقه .. تحسفت على شبابي الضايع بمدارسنا الطفسه
ولا ياحلوين عمركم شفتو فصل شكله دائري


حبيبي انت تتكلم عن وزارة التربيه والتعليم .. يعني لازم تتكلم عن مدرسه حكوميه
موب تقوم تلبق عند اقرب مدرسه اهليه بحيك الراقي لو افرك بخشتي من اليوم الى بكره بكريم جولسليد .. ماطاح هالغبار اللي بخشتي
ماخبرت مدارسنا بالرياض فيها طخوم تسذا .. يمكن يجي فيها واحد بس .. او اثنين طخووم
بس كلهم طخوم << ابو شقيري صدز بلاهي وش هالمدرسه :151:




ثالثاً : يابو شقيري اسلوب التحفيز بالجوائز .. لاتحسب اننا ماجربناها .. ترا هالطريقه مجربه منذ العصر الحجري
حتى اذكر ان جدي الله مير يطول بعمره بسنة السبله فاز فصلهم بذاك الوقت
يعني ياحبيبي من يوم ماعرفنا المدارس وهي تسذا
يقوم مشرف النشاط .. ويسوي كل سنه مسابقة اجمل فصل بالمدرسه
ويجيك فصل واحد ويحط حيله بفصله .. ويعلق عليها ذيك الزينات من ابو ريالين .. ويجيبون وحده ويعلقونها بالمروحه .. وثنتين بالجدران .. ويظللون الدرايش بتجليده سودا :==١:

ولاشافوهم الفصول الثانيه .. يجيهم احباط شديد ممزوج بالانكسار .. ويقولون خلاص شباب شكل ذاك الفصل هم اللي بيفوزون

يعني اسلوب التحفيز والله لو تطامر من اليوم الا بكره ماطقو لك خبر
وهمهم الاول والاخير .. هو رحلة لحديقة الحيوان .. ولا لمركز الملك عبدالعزيز التاريخي .. موب نظافة فصلهم



برايفت يابو شقيري :

( حبهم لهالرحله موب للتعلم واكتشاف الاشياء .. ترا بس عشان يطلعون من هالمدرسه ويفتكون من غثه المدرسين .. يعني بالعربي طويلين العمر طالعين يغيرون جو )




رابعاً يابو شقيري .. اذا تبي مدارسنا تزين وتكون نظيفة .. ترا البلا موب بس على الطلاب << ترا عندنا مدرسين ياكثرهم كمخ :==١:

والله صدز .. عندنا مدرسين يمّشون خششهم بمنديل .. ويجدعونهن بالسيب .. واطقع مايشوفون
عندنا مدرسين مصطلحات ( انت حمار ماتفهم .. ياحيوان له تسوي تسذا .. يابهيمه ورا ماحليت الواجب .. الخ ) لازقتن فيهم ومستحيل يغيرونها

عندنا مدرسين .. الطالب حلو ومزيون .. جلس يسولف ويطق حنتس معه .. والطالب الاشهب مثلي .. قام ولعن خامس خامسه
والمدرس الشديد هذا مكروه للطالب والطالب بيعانده .. والمدرس الحبيب الطالب بياخذ راحته .. وبيقلبون الحصه ( أعطني طرفه يافتى )


ولا انا اتحداك واراهنك .. انك تخلي هالنظام يطبق بتنظيف المدارس وينجح .. لان اللي بيطبق النظام بالمدارس .. هم المدرسين نفسهم
واذا كان هالمدرس نفسه كذا اسلوبه وتعامله غبي فما بالك بالطالب




خامساً يابو شقيري : شف انا عندي اقتراح .. لكن اشك بنجاحه
الا وهو انك اذا بغيت تطبق فكرتك .. اول شي تسويه هالبنقالي اللي ينظف الساحه عقب كل فسحه وينظف الفصول عقب كل طلعه
تمنعونهم من المدارس وتسفرونهم وتقلعونهم لديرتهم :==١:

والوعد بعد اسبوع ياباشا << شفت ذيك كومة الزباله اللي طلعت من دعاية البيك حقت نزيه وورطان يوم انهم بالمدرسه
اشك شك كبير انها بتصير اكثر منها

ياحبيبي للمره المليون اقولها لك واقولها لغيرك حنا شعب رافعين لافته قسمن بالله رافعين لافته مكتوب فيها

( بنقلادش :ق١: سيرلنكا :ق١: الهند :ق١: اندنوسيا )



نحن شعب لن نسغتني عن خدماتكم ابدن ابدن ابدن


ياخي ماتفهم انت :roo7-1 (228):

حنا شعب عجاز .. شعب مانسوي شي
وكل يوم طالعين لنا بنظام جديد .. يخليك عجاز اكثر من قبل

وهالحين طالعين لنا بنظام جديد .. بيخلينا عجازين اكثر من قبل
اللي هو نظام جديد بيطرح بالسعوديه .. الا وهو ( البيت الذكي :==١: )

كل شي تسويه وانت منبطح على بطنك بالصاله .. تبي تولع النور
لا ياطويل العمر .. وانت جالس تولعه .. تبي تشغل المروحه
لا ياطويل العمر .. لاتعب نفسك .. من مكانك تشغله
كل شي في بيتك بريموت .. وانت راجع من الدوام ميت حر .. ارفع السماعه ودق على البيت
والنظام بنفسه يشغلك المكيف

وتقول ورانا تسسذا .. حبيبي خلاص كل يوم يطلع لنا شي جديد يعودنا على شي

وعيبنا اننا لاتعودنا على شي .. انسى نستغي عنه .. واكبر مثال
اول ماطلع لنا التلفزيون .. كنا نغير القناة بالفرار من التلفزيون نفسه ذاك ابو باب خشبي
والفيدو لابغيت تقدم مقطع ماتبيه .. تقوم من نفسك وتضغط الزر من الفيديو ( وكنا عايشين احلى عيشه )

بس الحين .. لو تفتح محل وتبيع تلفزيونات بدون ريموت << صفقني احد يشتريه منك

تدري ليه .. لاننا تعودنا اننا نغير القناة وحنا منبطحين بمكانا
وتعودنا بعد ان وساختنا البنقالي يجي عقبنا بنفسه يشيلها :==١:




سادساً : يابو شقيري ممكن اعرف وراه ماعكست الايه .. وبدال ماتوري الوزير المحاسن توريه المساوئ
ليه ماتقوم وتقضبه وتسحبه وتدخله بمدرسه حكوميه .. وتخليه يشوف هالمبرزه وش يسوون .. وتصوره لنا مع طمالة هالمبزرة .. وتعرضه لنا بحلقتك


أوه عفواً اخواني اخواتي ... نسيت ان الكاميرا عندنا كذابه وتحب تزين صور المسئولين





المهم يااستاذ أحمد الشقيري .. انا وقسم شخص معجب فيك وبفكرك الراقي :ق١:
ومعجب بطروحاتك .. ومعجب بكلامك .. ويشهد الله على كلامي مع اني لاعرفك ولا تعرفني
وتراني غير محطم .. وشخص متفائل << يعني لاتفهمني غلط :==١:

بس انت ببرنامجك هذا يوم عرضته لنا وخصيته للشعب السعودي :151:
كأنك جايب شمعة لنا طافيه وحاطها قدامنا ومجلسنا حولها .. وتقول يالله ياحلوين تفاءلو انها تولع

المعنى يابو شقيري اننا لازم نعمل بالاسباب .. واول شي لازم نسويه عندنا .. هو التغيير الجذري للنظام .. لان التغير البسيط ماينفع معنا ابد
وقبل ماتعلم الطلاب .. لازم تعلم المدرسين .. وقبل ماتعلم المدرسين .. تعلم المسئولين :==١:


خلنا ناخذ على سبيل المثال .. نظام المرور عندنا .. غثو ام ام ام ام ام امنا باسبوع المرور
ويجلسون يوعونا سنين .. يافلان اربط الحزام .. لاتسرع فالموت اسرع .. لاتفقد ابتسامه طفلك بحادث .. الخ
وبالاخير .. هالاعلانات حقات التوعيه .. صارت سفره لنا بكل عشوه نتعشاها

لكن اخوانا بالمرور شافو انه مايمشي معنا الطيب وطبقو نظام صارم .. ياأنا ياأنت .. وحطو نظام ( ساهر ) ومانيب متحدث عن مساوئه
لكن شف هالنظام وش سوا فينا .. ابن امك وابوك تمشي فوق 120 بالدائري :==١:


بس تبي تدري ان ساهر ماحل مشكله السرعه كلها .. رح لشارع معروف انه مافيه كاميرا لساهر
السيارات انواع التشطيف بيشطفونك .. من يمين ومن يسار .. تسنهم ماصدقو خبر انه يسرعون ( ليش !!؟ لانهم تعودو ومايبون يغيرون هالعاده )

يعني تبي الشعب يمشي معك مضبوط .. سو فيهم تسذا
تبي المدارس تصير نظيفه .. حط نظام صارم بصرامه ( ساهر ) واحتمال يضبط .. واحتمال لا
بس عيبه خله يضمن انه بمكان مايغرم او يعاقب لاجدع زبالته .. والله مايطق خبرك ولا خبر هالنظام واللي جابه :==١:


بالعربي الفصيح .. هذا شي حنا تعودنا عليه .. لو حطيتني بمكان وفوقي كاميرا .. ماجدعت شي بالارض
بس اول ماطلع من هالمكان .. اتغير 180 درجه

هالشي بنفسونا .. هالشي تعودنا عليه خلاص
ونظامنا حنا بشكل عام .. الشاب السعودي مايهتم الا بشي واحد ( نظافة سيارته فقط ) وتلقاه اربع وعشرين تبن مسنتر بالمغسله يغسل موتره
وعقب كل مغرب يسنتر لك بمحل زينة يجلس يزبرق مورته
والفتاة السعوديه ماتهتم الا بشي واحد فقط ( نظافة وجهها واخراجه لنا بصورة حسنه )

ولا الباقي .. الله مير يخلي ميري وستي




وادري اني طولت عليكم .. بس وش اسوي << حرام اشوف واحد يدفع ملايين على برنامج .. وبالاخير تروح هوا